2026-yil 1-yanvardan boshlab O‘zbekistonda haydovchilarni tayyorlash tizimiga o‘zgartirishlar kiritildi va bu allaqachon avtomaktablar faoliyati hamda bo‘lajak haydovchilarning xatti-harakatlarida o‘z aksini topmoqda. Hukumat haydovchilik guvohnomasini olish qoidalarini, ayniqsa moped va skuterlar uchun qayta ko‘rib chiqdi: A1 toifasi joriy etildi. Ushbu toifa bo‘yicha avtomaktabda majburiy o‘qish talab etilmaydi — imtihonni bevosita topshirish kifoya. Bu toifa uchun nazariy test boshqa toifalarga nisbatan biroz soddaroq.
Bundan tashqari, 2026-yil 1-fevraldan boshlab “A” (mototsikllar) va “B” (yengil avtomobillar) toifalari bo‘yicha nazariy mashg‘ulotlarga majburiy qatnashish bekor qilindi. Endi istaganlar mustaqil ravishda — onlayn kurslar, oflayn darslar yoki o‘quv materiallari orqali tayyorlanishlari mumkin. Shu bilan birga, avtomaktablarda amaliy mashg‘ulotlardan o‘tish majburiyligicha qolmoqda.
Avtomaktablar vakillarining ta’kidlashicha, bu o‘zgarishlar tahdid emas, balki bozor uchun moslashuv davridir. Ularning fikricha, qisqa muddatda nazariy kurslarga bo‘lgan rasmiy talab kamayishi mumkin, biroq tuzilmali yondashuv, qo‘llab-quvvatlash va yo‘l harakati qoidalarini chuqur tushuntirib bera oladigan sifatli avtomaktablar baribir talabgir bo‘lib qoladi
